Flestir landeigendur við Jöklu vilja dómsmál

Meginþorri eigenda vatnsréttinda við Jökulsá á Dal eða 61 þeirra hefur ákveðið að una ekki úrskurði matsnefndar um verðmæti réttindanna vegna Kárahnjúkavirkjunnar og skjóta ágreiningnum til dómstóla. Frestur til að ákveða slíkt rann út í dag, 3. október. Það verður lögmannstofan Regula á Egilsstöðum sem annast málið fyrir landeigendur.

Í tilkynningu frá Regula sem undirrituð er af Jóni Jónssyni hdl ásamt sex öðrum lögmönnum stofunnar segir m.a. það sé álit þeirra að niðurstaða matsnefndarinnar...hafi ekki byggt á viðurkenndum lagareglum um fjárhæð eignarnámsbóta. Því hafi niðurstaðan hvorki byggt á sjónarmiðum um markaðsverð réttindanna né notagildi þeirra.

Það er jafnframt mat lögfræðinganna að sératkvæði eins af matsnefndarmönnum væri mun nær lagi um ákvörðun fullra bóta. Sem kunnugt er af fréttum var verðmæti réttindanna metið á bilinu 10 til 65 milljarðar kr. í sérálitinu. Meirihluti matsnefndarinnar taldi verðmætið aftur á móti vera 1,6 milljarð kr.

"Það er ljóst að frá gildistöku raforkulaga hefur orðið skýr verðmyndun á frjálsum markaði um greiðslur orkufyrirtækja fyrir vatnsréttindi enda hefur skapast samkeppni milli orkufyrirtækja," segir m.a. í tilkynningu Regula. "Þannig liggja t.d. fyrir samningar um greiðslur fyrir vatnsréttindi vegna 10 MW virkjana sem meta má til mörg hundruð milljóna að núvirði."