Undrast umfjöllun norsks fjölmiðils um rítalínnotkun hérlendis

Ekkert bendir til þess að rítalín sé ofnotað hér á landi að sögn Matthíasar Halldórssonar, landlæknis. Hann segir umfjöllun norska dagblaðsins Dagsavisen þar sem rítalínnotkun hér á landi er borin saman við neyslu í fátækrahverfum Bandaríkjanna vera einkennilega.

„Við erum með svipaða neyslu í þessum lyfjum og Bandaríkjamenn almennt," sagði Matthías Halldórsson, landlæknir, í samtali við Vísi. „Þessi samlíking við fátækrahverfi er því frekar einkennileg."

Fjallað var um aukna rítalínnotkun norskra ungmenna í norska dagblaðinu Dagsavisen á mánudaginn. Þar kemur fram að á Íslandi sé rítalínneysla barna mest á Norðurlöndum. Er ástæðan meðal annars rakin til þess hversu margir íslenskir læknar séu menntaðir í Bandaríkjunum.

Matthías segir að lengi vel hafi afstaða lækna til rítalíns og svipaðra lyfja verið mismundandi eftir því hvort þeir voru menntaðir í Evrópu eða Bandaríkjunum. Á undanförnum árum hafi þessi munur hins vegar jafnast út. „Rítalínneysla er að aukast í Evrópu. Íslenskir læknar hafa verið á undan læknum á Norðurlöndum í þessum málum. Notkun rítalíns hefur hins vegar verið að aukast á Norðurlöndum."

Þá segir Matthías ekkert benda til þess að rítalín sé ofnotað hér á landi. Hann segir að nú sé verið að leggja lokahönd á vinnu sem hafi það markmið að skerpa ennfrekar meðhöndlun rítalíns og álíkra lyfja. „Við þurfum að sjálfsögðu að fara varlega og koma í veg fyrir misnotkun. Hins vegar eru engin merki um ofnotkun rítalíns hér á landi."