Þjófagengi lék lausum hala í borginni

Lögreglan á höfuðborgarsvæðinu upprætti þjófagengi í borginni í gær. Sjö útlendingar voru handteknir vegna gruns um skipulagða þjófnaði úr hinum ýmsu verslunum.

Þýfið fanns við húsleit í austurborginni en um er að ræða snyrtivörur, fatnað, tölvuhluti og varning úr stórmörkuðum. Fólkið er vistað í fangageymslum lögreglunnar og eru lögfræðingar embættisins að fara yfir málið og ákveða hvort farið verði fram á gæsluvarðhald.

Að sögn lögreglu er verið að skrá þýfið og að því loknu verður reynt að meta verðmætið. Að sögn lögreglu er fólkið ekki búsett hér en hefur dvalið í landinu um skeið. Einhverjir munu hafa verið hér um skeið.

Einn úr genginu var á leið úr landi og telur lögreglan víst að hann hafi ætlað að hafa hluta þýfisins með sér og selja það í heimalandinu.