Hörð gagnrýni á Ríkiskaup vegna sölu NATO-eigna

Einar Örn Thorlacius sveitarstjóri Hvalfjarðarsveitar hefur sent Ríkiskaupum bréf vegna fyrirhugaðrar sölu ríkisins á fyrrum eignum NATO í Hvalfirði. Í bréfinu koma m.a. fram alvarlegar athugsemdir við framkvæmd sölunnar þar sem þessar eignir séu ekki til í fasteignamatinu og að svæðið sé ekki til á neinu skipulagi.

"Við teljum þennan framgangsmáta með öllu óviðundandi sem og að fjármálaráðuneytið hafði ekkert samráð við okkur um þessa sölu áður en hún var ákveðin," segir Einar Örn í samtali við Vísi. Málið var rætt á fundi sveitarstjórnar Hvalfjarðarsveitar síðdegis í gær.

Samkvæmt því sem fram kom á fundinum hafa Hvalfjarðarsveit og Faxaflóahafnir ákveðið að bjóða sameiginlega í eigurnar. Sat Gísli Gíslason hafnarstjóri fundinn en Hvalfjarðarsveit á 10% í Faxaflóahöfnum og hefur mann í stjórn þeirra.

Olíudreifing ehf. hefur einnig áhuga á að bjóða í eigurnar og var erindi frá fyrirtækinu tekið til umræðu á fyrrgreindum fundi. "Olíudreifing, sem og allir aðrir sem ætla að bjóða í verkið búa við sama vanda sem er að ekkert skipulag um notkun þess er til staðar," segir Einar Örn. "Þeir sem kaupa eignirnar verða að bíða eftir ákvörðun sveitarfélagsins um hvernig svæðið verður skipulagt og undir hvaða not það fer. Þess vegna gagnrýnum við harðlega framgangsmáta málsins af hálfu fjármálaráðuneytisins."