Strokufangarnir ófundnir

Lögreglan hefur enn ekki fundið fangana sem létu sig hverfa í lok AA fundar á Litla Hrauni, um klukkan níu í gærkvöldi. Strax var gerð ítarleg leit á fangelsissvæðinu sjálfu og við Litlu kaffistofuna var leitað í öllum bílum, sem óku í átt til höfuðborgarsvæðisins, en án árangurs.

Ekki hefur enn verið tilkynnt um bilþjófnað á Suðurlandi í nótt og eru engar vísbendingar um hvernig eða hvert þeir fóru. Þeir eru báðir rúmlega tvítugir og með langan afbrotaferil að baki. Lögregla óttast þó ekki að þeir muni beita ofbeldi á ferðum sínum.-