Vilja selja nýja Grímseyjarferju og láta smíða nýja

Jón Bjarnason og Árni Þór Sigurðsson, fulltrúar Vinstrihreyfingarinnar - græns framboðs í fjárlaganefnd og samgöngunefnd Alþingis, hafa farið fram á að samgönguráðherra skipi nú þegar óháða nefnd með aðild heimamanna í Grímsey til að fara yfir þá kosti sem eru nú í stöðunni varðandi nýja Grímseyjarferju.

Fram kemur í tilkynningu frá Vinstri - grænum að þingmennirnir vilji að nefndin kanni hvort ekki sé hagkvæmara og öruggara að hætta endurbótum á ferjunni sem nú er í Hafnarfjarðarhöfn og selja hana. Í staðinn verði samið um byggingu nýrrar ferju sem þjóni farþega- og vöruflutningum sem best á þessari leið.

Benda Vinstri - græn á að með snörum handtökum geti ný ferja verið tilbúin árið 2009 þegar undanþáguheimild núverandi ferju rennur út.