Á Akrafjall eftir hvern sigurleik

Katrín Leifsdóttir, heimilisfræðikennari í Grundaskóla á Akranesi og móðir Páls Gísla Jónssonar markvarðar Skagaliðsins í knattspyrnu, hefur í sumar gengið upp á Háahnúk á Akrafjalli í hvert skipti sem liðið ber sigur úr býtum í leikjum Landsbankadeildarinnar. Hún segir hugmyndina nánast úr lausu lofti gripna.

„Strákarnir í Skagaliðinu töpuðu og töpuðu í vor. Ég sagði svo einhvern tímann við Pál Gísla að nú myndi ég labba á fjallið í hvert skipti sem þeir myndu fara með sigur af hólmi. Þá fóru þeir að vinna! Ég labbaði fyrst 10. júní og er búin að labba sjö sinnum síðan.

“Katrín labbar ekki alltaf ein því henni hefur tekist að fá tengdadóttur sína, dóttur, systur og vinkonu með. Hún segist þó aldrei fresta göngunni að ráði og fer jafnvel upp á fjall strax eftir leiki. Hún segir að þótt gangan taki stuttan tíma sé þetta prýðis kraftganga en Háihnúkur er í 555 m hæð.

Aðeins þrír leikir eru eftir á þessari leiktíð en Katrín útilokar ekki að hún endurtaki leikinn og þótt Skagaliðið hafi fyrst farið að sigra í leikjum eftir að Katrín hét á það segist hún ekki þakka sér sigra liðsins. „Nei, þetta var nú meira gert í gríni. Annars er þetta ágætis hvatning fyrir mig til þess að fara á fjallið. Það er spurning hvort ég taki ekki að mér að labba fyrir fleiri lið.“