Frumburðurinn fæddist á sömu mínútu og myndin hófst

„Hún kom í heiminn 21 mínútu yfir átta, nánast á sömu mínútu og myndin byrjaði. Þetta var lygasögu líkast," segir leikstjórinn og nýbakaði faðirinn, Gunnar Björn Guðmundsson. Hans fyrsta kvikmynd í fullri lengd, Astrópía, var frumsýnd fyrir troðfullum sal Bíóhallarinnar í Álfabakka í fyrrakvöld en á sama tíma var leikstjórinn sjálfur staddur á fæðingardeildinni að taka á móti frumburði sínum.

Gunnar missti því af stærstum hluta frumsýningarinnar en kom í salinn þegar um 10 mínútur voru eftir. „Þá hélt ég ræðuna sem átti að vera fyrir myndina og náði að heilsa upp á fólkið. Síðan lá leiðin aftur upp á fæðingardeild," segir leikstjórinn.

Honum og eiginkonu hans fæddist dóttir og segir leikstjórinn að öllum fjölskyldumeðlimum heilsist vel. „Hún átti að koma í september en vildi greinilega ekki að Astrópía tæki alla athygli pabba síns og var því ekkert að láta bíða eftir sér," segir Gunnar og hlær. Nokkrir hafa skotið því að Gunnari að það eina rétta í stöðunni sé að nefna dótturina Astrópíu. „Án þess að ég viti hvort það megi þá held ég að ég geti útilokað það hér og nú. Dóttir mín mun ekki heita Astrópía," sagði Gunnar og hló.

Astrópía hlaut glimrandi viðtökur á frumsýningunni og hefur verið fullt út úr dyrum í alla sali Sambíóanna frá því á miðvikudagskvöld. Þá hefur kvikmyndin fengið fína dóma hjá gagnrýnendum. „Ég geng um á bleiku skýi og held að ég ljúgi engu þegar ég segi að þetta hafi verið eftirminnilegasti dagur lífs míns. Ég er hamingjusamasti maður í heimi."