Perez Hilton langar til Íslands

Konungur slúðursíðanna, Perez Hilton, sem sjálfur kallar sig „The Queen of All Media“ virðist hafa gerst sérlegur verndari íslensk tónlistarlífs. Á þriðjudag mælti hann með tónlist Hafdísar Huldar Þrastardóttur á afar fjölsóttri síðu sinni, undir fyrirsögninni „Sætur lítill álfur“.

Um söngkonuna skrifar hann „Hún er dásamleg“ og líkir henni við leikkonuna vinsælu Zooey Deschanel hvað varðar útlitið. Hann býður lesendum svo upp á að hlusta á lögin Tomoko og Who Loves The Sun af plötunni Dirty Paper Cup.

Þegar færslan um Hafdísi Huld birtist voru ekki liðnar nema nokkrar vikur frá því að umræddur Perez birti myndband Páls Óskars við lagið Allt fyrir ástina á síðunni. Myndbandið hefur, þegar þetta er skrifað, verið skoðað yfir 140 þúsund sinnum, og óhætt að áætla að hrifning Perez hafi haft sitt að segja þar.

Perez Hilton féllst á að svara nokkrum spurningum Fréttablaðsins, og heldur þannig innreið sína í íslenska fjölmiðla. Hvað varðar áhuga hans á íslensku tónlistarlífi sagðist slúðurblaðamaðurinn ekki leggja sérstaka áherslu á að fylgjast með íslenskri tónlistarsenu. „Ég fylgist með góðri tónlist. Góð tónlist er góð tónlist,“ sagði Perez einfaldlega. Hann kvaðst þó hafa áhuga á að sækja landið heim. „Ég hef ekki komið til Íslands ennþá, en það væri æðislega gaman að komast bráðlega,“ sagði hann.