Snýr baki við fjölskyldunni

Fjölskylda, vinir og samstarfsmenn Kate Moss eru í sárum eftir að fyrirsætan ákvað að stökkva á ný í faðm eiturlyfjafíkilsins og rugludallsins Pete Doherty.

Breskir fjölmiðlar telja sig vita með vissu að Kate hefur dvalið hjá rokkaranum Pete í lúxussvítu hans á Claridge"s hótelinu í London síðustu daga og hefur sést til þeirra fyrir utan hótelið í nokkur skipti þó svo að aldrei hafi náðst mynd af þeim saman. Að sögn heimildarmanna bresku götublaðanna er lögð mikil áhersla á að þau yfirgefi og gangi inn í hótelið sitt í hvoru lagi, svo fjölmiðlar fái ekki það myndefni sem þeir þrái hvað mest.

Ekki eru liðnir nema tveir dagar síðan Pete var handtekinn og síðan sleppt aftur fyrir meint fíkniefnabrot og þar með rof á skilorði, en vegna tæknilegra mistaka lögreglu og dómsyfirvalda þar ytra var ekki hægt að ákæra söngvarann. Mun fjölskylda hinnar 33 ára gömlu Kate vera með böggum hildar vegna endurfunda hennar og Pete, en ekki er langt síðan stormasömu sambandi þeirra lauk formlega. Kate virðist hins vegar ekki geta sleppt takinu af Pete sínum, jafnvel þótt öllum sé kunnugt um þau slæmu áhrif sem hann hefur á heilsu og ímynd fyrirsætunnar. Jafnvel er talið að helstu samstarfsaðilar Kate í fata- og snyrtivörubransanum séu búnir að missa þolinmæðina á stúlkunni og muni slíta öllu samstarfi nái hún sér ekki upp úr þeirri vitleysu sem þeir vilja meina að samband hennar við Pete sé.

Daily Mail hefur eftir fjölskylduvini að Linda, móðir Kate, sé algjörlega miður sín. „Þau höfðu ekki talast saman í margar vikur og Linda var í skýjunum. Síðan fékk hún að heyra það frá Kate að þessi aðskilnaður hefði aðeins gert ást hennar til Pete sterkari. Linda brotnaði saman við að heyra það,“ segir vinurinn.