Rómantískt frí hjá Vilhjálmi og Kate

Vilhjálmur Bretaprins og kærasta hans, Kate Middleton, eru nú í fríi á eyjunni Desroches í Indlandshafi. Eyjunni er lýst sem rómantískustu eyju heims og hafa bresk dagblöð getið sér til að prinsinn hyggist nota þetta tækifæri til að biðja um hönd kærustunnar.

„Vilhjálmur vildi ólmur fá að vera einn með Kate í smá tíma. Eyjan er fullkomin fyrir það, hún er svo afskekkt. Venjulega er mikið um fólk þar í brúðkaupsferðum en þau hafa bókað alla eyjuna fyrir sig,“ segir heimildarmaður The Sun. Til þessa hafa vinir Vilhjálms og Kate alltaf verið með í för þegar þau hafa farið í frí. Að þessu sinni voru þau ákveðin að vera í friði.

Skötuhjúin reyndu að leyna för sinni fyrir breskum götublöðum en árvökul augu þeirra létu ekki blekkjast. Vilhjálmur flaug einn á áfangastað á miðvikudag en Kate degi fyrr. Vilhjálmur og Kate hafa eyjuna rómantísku út af fyrir sig í heila viku.