Níu ára breikari með mikinn metnað

Örlygur Steinar Arnalds, níu ára, er fantagóður breikari. Í vikunni vakti hann athygli fyrir frammistöðu sína á breiksýningu í Kringlunni, enda yngsti breikarinn í hópnum sem þar kom fram. „Hann byrjaði mánuði fyrir átta ára afmælið sitt,“ útskýrði móðir hans, Anna Sigríður Örlygsdóttir, sem segir áhugann hafa verið til staðar frá þriggja, fjögurra ára aldri. „Aldurstakmarkið í Kramhúsinu var hins vegar átta ár,“ sagði hún.

Örlygur segir breik hafa orðið ofan á, þar sem að aðrar íþróttir höfði ekki til hans. „Mér finnst fótbolti og þannig ekkert skemmtilegt,“ sagði hann. Hann kveðst ekki eiga neitt uppáhaldsspor í breikinu, sem samanstendur af hreyfingum og sporum sem flesta óar við að reyna að framkvæma.

„Mér finnst bara allt gaman. Sum sporin eru erfið, en ég æfi mig líka heima,“ sagði hann. Metnaðurinn er á sínum stað. „Ég byrjaði líka í fimleikum til að styrkja mig í breikinu,“ sagði Örlygur.

Breikið sótti Örlygur fyrst hjá Natöshu Monay Royal í Árbæjarþreki, en síðar í Kramhúsinu. Natasha hefur staðið fyrir keppnum í breiki, og Örlygur hreppti annað sætið í fyrra.

Hann hefur þó breikað víðar en í Kringlunni. „Örlygur breikaði á Spáni í sumar. Á einum veitingastaðnum var reglulega danssýning með breikatriðum, og hann var tekinn upp í þau. Hann var bara í sjálfboðavinnu,“ bætti hún við.

Örlygur, ætlar að halda áfram í breikinu, mun breika fyrir framan Háskóla Íslands í dag, þar sem Latabæjarhlaupið fer fram.