Þórhallur ræður sér fulltrúa

"Þetta er ekki aðstoðarmanneskja eins og auðkýfingarnir eru með," segir Þórhallur Gunnarsson, dagskrárstjóri RÚV, en nýverið var auglýst eftir starfi fulltrúa dagskrárstjóra í Efsaleiti. Einhverjir fengu þá grillu í hausinn að þarna væri dagskrárstjórinn að feta í fótspor forstjóra stórfyrirtækjanna og auðjöfra sem flestir hafa talsmenn eða svokallaða aðstoðarmenn á sínum snærum til að svara fyrir sig og taka símann.

Þórhallur þvertekur fyrir það að þetta sé einhver persónulegur aðstoðarmaður hans heldur sé um að ræða nýtt starf. "Það hefur verið hér framleiðslustjóri á dagskrárdeildinni sem er að hætta og umræddu starfi er ætlað að ganga inní það starf en með einhverjum breytingum þó," útskýrir Þórhallur. "Þetta er því í raun nýtt starfsheiti byggt á gömlum mergs sem tekur um leið nokkrum breytingum. Starfið fær nokkur ný hlutverk en missir um leið önnur," bætir hann við.