Ólafur sagður sænskur

Íslendingar lenda stundum í því að nöfnum þeirra sé snúið á hvolf og farið er með rangt þjóðerni þeirra. Ólafur Jóhannesson er nýjasta fórnarlambið.

„Ég er ekki Svíi og á engar ættir að rekja til Svíþjóðar,“ segir kvikmyndaleikstjórinn Ólafur en hann hefur nú bæst í hóp þeirra Íslendinga sem hefur verið sviptur föðurlandi sínu og var nýlega sagður sænskur á hinni vinsælu kvikmyndasíðu AC Media. Á síðunni var verið að greina frá næstu verkefnum leikaranna úr mafíu-þáttunum Sopranos en eins og komið hefur fram í Fréttablaðinu leikur einn aðalleikari þáttanna, Micheal Imperioli, stórt hlutverk í nýjustu kvikmynd Ólafs, Stóra planið.

Að sögn Ólafs skilur hann ekkert hvernig þessi misskilningur getur hafa átt sér stað. En fréttin hafi farið víða og Ólafur er alls staðar sagður vera sænskur leikstjóri. Leikstjórinn er þó ekki eini Íslendingurinn sem hefur lent í þessum misskilningi en vinur hans, Dagur Kári, er oft sagður vera danskur og þar að auki hafa Danir verið duglegir við að eigna sér listamanninn Ólaf Elíasson þannig að eitthvað virðist Ólafs-nafnið flækjast fyrir blaðamönnum. Ekki má hins vegar gleyma knattspyrnukappanum Jon Dahl Tomason sem fjölmiðlar þreytast seint að minnast á að er íslenskur í aðra ættina.

Leikstjórinn sagðist þó gera sér grein fyrir því að hið nýja þjóðerni gæti opnað honum nýjar dyr. Svíar væru jú framarlega í kvikmyndageiranum. „Svona kannski til lengri tíma litið er þetta kannski ekki svo slæmt,“ segir Ólafur. Tökum á Stóra planinu er nú lokið og situr Ólafur sveittur við að klippa myndina en með aðalhlutverkin fara þeir Pétur Jóhann Sigfússon og Eggert Þorleifsson.