Með fullt hús af brúðum

„Ég hefði orðið að flytja út fyrir rest. Núna kemst ég fyrir heima hjá mér,“ segir Helga Ingólfsdóttir, þroskaþjálfari sem gaf nýlega Byggðasafninu í Reykjanesbæ brúðusafnið sitt. Helga átti orðið tæplega tvö hundruð brúður þannig að þetta er vegleg gjöf til safnsins.

Helga byrjaði að safna brúðum fyrir um tíu árum út frá vinnu sinni sem þroskaþjálfi. „Mér finnst við aðeins þurfa að staldra við og hugsa um gildi hlutverkaleiksins. Brúður og bangsar eru oft bestu vinir barnanna en tölvur geta aldrei orðið það.“ Helga tekur þó fram að hún hafi alls ekkert á móti tölvum og hafi notað þær töluvert í sínu starfi. Þær geti þó aldrei komið í staðinn fyrir frjálsan leik og tilfinningatengslin á milli barns og brúðu eða barns og tölvu séu alls ekki sambærileg.

Helga segir brúðurnar hafa komið víða að. Hún vann um tíma fyrir Rauða krossinn við að þrífa brúður og hafi fengið eina og eina brúðu í staðinn. Hún fékk þær líka í Góða hirðinum og ýmsum búðum með notaðar vörur.

Upphafið að brúðusafninu var að Helgu vantaði eitthvað til að dreifa huganum. „Á meðan aðrir sökkva sér kannski í þunglyndi reyni ég að hafa eitthvað fyrir stafni. Ef mér líður illa reyni ég að gleyma mér í einhverju, með því að hafa eitthvað í höndunum.“

Ástæða þess að Helga ákvað að gefa Byggðasafninu brúðurnar er sú að hún var svo hrifin af því starfi sem Byggðasafnið hefur staðið fyrir síðustu ár. „Ég var búin að sjá margar skemmtilegar sýningar hjá þeim og langaði til að leggja mitt af mörkum.“

Það er ekki mikið til af leikföngum á söfnum landsins en það stendur nú til bóta því að aukist hefur að safnarar á borð við Helgu gefi söfnum leikfangasöfn sín. „Þetta er auðvitað hluti af menningarsögunni. Það hafa meira að segja fundist brúður í grafreitum forn Egypta.“

Helga segir að þó hún sé búin að gefa brúðusafnið sitt sé hún nú ekki alveg hætt að safna. „Þetta er náttúrulega ástríða. Svona söfnunar ástríða deyr ekki svo glatt.“

Brúðusafnið er til sýnis í Bókasafninu í Reykjanesbæ á opnunartímum þess.

Þess má geta að sýning á handprjónuðum þjóðbúningum á dúkkur sem Helga gerði eru nú til sýnis í búð Handprjónasambandsins á Skólavörðustíg.