Fastagestir ekki kátir

Heilsuræktarkóngurinn Björn Leifsson á í viðræðum við Reykjavíkurborg um hugsanlegan möguleika þess að byggja líkamsræktarstöð og 25 metra laug við Vesturbæjarlaugina. Þetta staðfestir Björn í samtali við Fréttablaðið. Borgin stóð fyrir samkeppni um svæðið við hliðina á lauginni austan megin og var Björn sá eini sem skilaði inn gildum gögnum. Málið er enn á byrjunarstigi og ekki er komið á hreint hvort af þessu verður eða hvenær. „Það var sett á fót nefnd sem á að kanna hvort það þjóni hagsmunum beggja að fara af stað,“ útskýrir Björn.

„Ég get ekki sagt að ég hoppi hæð mína af kæti yfir þessum fréttum,“ segir Margrét Kristín Blöndal en hún er einn fjöldra fastagesta Vesturbæjarlaugarinnar. „Ég er afar viðkvæm fyrir lauginni minni og þetta eru frekar miklar og nýjar fréttir fyrir mér,“ bætir hún við og segist þurfa að vega þetta og meta. „Ég skal alveg viðurkenna að ég yrði ekki mjög hrifin af því að fá eitthvað Laugar-Spa við hliðina á Vesturbæjarlauginni og það mætti margt fleira en akkúrat þetta koma þarna,“ heldur Magga Stína áfram og nefnir til að mynda barnalaug eða kaffihús sem yrði rekið af fastagestum. „Þetta hljómar bara alls ekki vel.“

Margrét Kristín viðurkennir að kannski hljómi hún svolítið fordómafull og að jaðri við fasíska hugsun þegar kemur að Vesturbæjarlauginni. „Kannski er þetta af því hún er svo gömul og hefur haldið sínum stíl og anda í gegnum öll þessi ár. Og það verður mikilvægt með árunum,“ segir Margrét, sem telur að fólk eigi að leyfa einhverjum hlutum að vera í friði.

Björn er sjálfur ekkert hræddur um að styggja fastagesti staðarins. Það hafi staðið lengi til að byggja 25 metra innilaug sem sunddeild KR geti nýtt sér og að líkamsræktarstöðin, sem samkvæmt teikningum verður upp á átta hundruð fermetra, eigi bara eftir að bæta þjónustuna við sundlaugargesti.