Enn einn angurvær Elvis

Ef foreldrarnir skíra þig Elvis er þér þá ætlaður frami á tónlistarsviðinu? Nú hefur stigið fram enn einn Elvis sem ber eftirnafnið Perkins en fyrsta plata hans, Ash Wednesday, hefur þegar hlotið lof í Bandaríkjunum.

Perkins hefur verið líkt við Rufus Wainright og Nick Drake en melankólían sem einkennir tónsmíðar hans er ekki síst til komin vegna harmrænnar fjölskyldu sögu; faðir Elvis, leikarinn Anthony Perkins dó úr alnæmi árið 1992 en móðir hans, ljósmyndarinn Berry Berenson dó í hryðjuverkaárásunum í New York. Perkins hefur rætt við marga fjölmiðla um frægð foreldra sinna og sambandið við föður sinn og móður. Honum var ekki aðeins strítt á Elvis-nafninu í skóla heldur var hann einnig uppnefndur sonur Normans Bates eftir þekktustu rullu föður síns.

Perkins á einn bróður, Osgood sem er leikari og handritshöfundur en hefur einnig gripið í trommusettið með bróður sínum.

Platan hefur verið lengi í burðar­liðnum. Perkins rekur upphaf hennar til ársins 2000 þegar hann var loksins farin að föndra af einhverri alvöru við tón- og textasmíðar. Dauði móður hans tafði hins vegar fyrir framanum en á plötunni eru fjölmargar vísanir til hennar. Í nýlegu viðtali við The Guardian kemur fram að Perkins hafi veitt sorg sinni út í tónlistina.

Vegur Perkins hefur farið jafnt og þétt vaxandi. Hann hefur hitað upp fyrir tónlistarmanninn Willy Mason og hljómsveitirnar Clap your Hands and say Yeah og My Morning Jacket, en hann er nú sjálfur farinn að þykja aðalnúmerið. Platan Ash Wednesday kemur út í Evrópu í byrjun júlí.