Þurfti 29 metra til að taka á loft

Íslandsmet í flugtakskeppni var sett á Njarðvíkurheiði á laugardag þegar Jóhann Gestur Jóhannsson, flugumferðarstjóri, flugmaður og fluvélagrúskari í Reykjanesbæ, náði að koma fisi sínu á loft á aðeins 29 metra langri braut.

Jóhann flaug sinni eigin vél af gerðinni Zenith 701 sem hann smíðaði sjálfur. „Þessi vél er með sérstökum slottum sem gerir henni kleift að taka á loft á stuttri braut og „stolla“ á tiltölulega litlum hraða. Ég þarf ekki að vera á nema 25 mílna hraða til að ná henni upp,“ segir Jóhann, en þetta var í fyrsta sinn sem hann tók þátt í slíkri keppni. Reyndar er ekki vitað til þess að áður hafi verið keppt í viðlíka þrautum á Íslandi.

Keppnin fór þannig fram að keppendur fengu ákveðna vegalengd til að reisa flugvél sína yfir streng sem strekkt var í um eins metra hæð. Jóhann var sá eini sem sleit ekki bandið. „Ætli þetta hafi ekki verið blanda af kunnáttu og hentugri flugvél.“

Jóhann er meðlimur í fisfélaginu Sléttan sem einmitt stóð fyrir flugtakskeppninni um helgina á árlegum flugdegi félagsins. Auk flugtakskeppninnar var efnt til ýmissa annarra þrauta og leikja, til dæmis í lendingum og sekkjakasti úr flugvélum. „Þetta var stórskemmtilegur dagur og margir mættu á staðinn til að fylgjast með.“

Jóhann hefur smíðað fjórar flugvélar um árin og hefur að eigin sögn einstaklega gaman af. „Þeir hafa gert grín að því að ég sé svona duglegur í þessu og kalla litlu verksmiðjuna í bílskúrnum heima „Jóeing“ í staðinn fyrir Boeing,“ segir Jóhann og hlær.