Hafa það gott í Mónakó Gistu á glæsilegu skemmtiferðaskipi

Íslensku keppendurnir á Smáþjóðaleikunum í Mónakó, sem lauk á sunnudaginn var, nutu lífsins á milli æfinga og keppna um borð í einu glæsilegasta skemmtiferðaskipi heims, Crystal Harmony.

Vegna skorts á hótelherbergjum í Mónakó brugðu skipuleggjendur leikanna á það ráð að leigja heilt skemmtiferðaskip fyrir alla keppendur leikanna, sem eru á annað þúsund talsins. Skipið stóð á besta stað við höfnina í Mónakó og segir Örn Andrésson, aðalfararstjóri íslenska hópsins, að þessi gistingarmáti sé nokkuð frábrugðin hinu „hefðbundna" hótellífi en jafnframt mun betri sem slíkur.

„Krakkarnir voru mjög ánægðir með þetta. Þau hafa ferðast víða og prófað margt en þetta er með því skemmtilegra sem þau hafa lent í," segir Örn.

Miðað við vistarverur á Harmony ætti ánægja íslenska hópsins ekki að koma á óvart. Í skipinu eru tvær sundlaugar, spilavíti, lítil verslunarmiðstöð, tugir veitinga- og skemmtistaða, bókasafn, kvikmynda- og leikhús. Helsta stolt skipsins er hins vegar 1000 fermetra líkamsræktarstöð og baðstofa sem innréttuð er í Feng Shui-stíl, þar sem boðið er upp á allar tegundir af nuddi og dekri nánast hvenær sólarhringsins sem er.

Einnig má finna golfhermi og púttvöll, skvassvöll og bókasafn, og þá er einnig er starfræktur vín- og vindla klúbbur á skipinu.

„Það væsir ekki um mann," sagði Magnús Þór Gunnarsson, leikmaður íslenska körfuboltaliðsins. „Verslunarmiðstöðin og spilavítið var ekki opið fyrir keppendur en það var samt hægt að finna sér nóg til afþreyingar. Við kvörtuðum í það minnsta ekki." Forsetahjónin Ólafur Ragnar Grímsson og Dorrit Moussaieff heimsóttu skipið ásamt Alberti prins í fyrradag og heilsuðu upp á íslenska hópinn.