Íslandsmet í Esjugöngu

Næstkomandi laugardag verður gerð tilraun í því að setja Íslandsmet í fjölda manns á Esjuna á einum degi. Fjallgönguhópurinn 5tindamenn standa fyrir uppákomunni.

Er hún ætluð sem upphitun fyrir góðgerðargöngu hópsins dagana 8. til 11. júní þegar ætlunin er að klífa hæsta fjallið í hverjum landshluta á einni helgi til styrktar Sjónarhóli. „Þetta konsept að halda þennan Esjudag kom sem hliðarverkefni út frá þeirri ferð til að fá fólk út til að hreyfa sig. Það er þema 5tinda-verkefnisins,“ segir Ívar Þórólfsson úr 5tindamönnum.

„Við byrjuðum á þessu í janúar. Við vorum örfáir með einhverjum gönguhópum síðastliðið haust og ákváðum að prófa upp á grínið og athuga hvort við gætum farið upp á Keili og Esjuna. Okkur fannst þetta svo gaman og þá kom þessi hugmynd út frá því.“

Ívar segir að það hafi verið frábært að vera í þessum gönguhópi, sem í eru níu manns. „Þetta er eitthvað sem við eigum eftir að halda áfram að gera um ókomna tíð.“ Bætir hann því við að á stefnuskránni sé að hópurinn klífi Mont Blanc á næsta ári.