Fimmti frægasti nörd í heimi

„Þetta er bara svona nánast eins og Forbes-listinn,“ sagði Jón Gnarr upp með sér þegar blaðamaður Fréttablaðsins greindi honum frá því að nafn hans væri hið fimmta sem kæmi upp á uppsláttarvefritinu wikipedia.org, ef leitað er að frægum nördum, eða „famous nerds.“ Jóni þótti staðsetningin á listanum mikil upphefð, en á Wikipediu fást ríflega 700 leitarniðurstöður með þessum orðum. Hann kvaðst mjög stoltur af nördískunni.

„Það gætir samt stundum misskilnings meðal Íslendinga,“ sagði hann alvarlegur. „Margir Íslendingar halda að nördar og lúðar séu eitt hið sama, samanber „nerd“ og „geek“,” sagði Jón, sem telur mikinn mun vera þar á. „Þetta er ekki komið í íslensku orðabókina ennþá, en það kemur einhvern tíma,“ sagði hann. „Munurinn á nörd og lúða er sá að nördar eru gáfaðir og skemmtilegir en lúðar eru vitlausir og leiðinlegir.

Leikmanni virðast þeir kannski svipaðir, en svo er ekki,“ sagði Jón.

Steve Jobs, forstjóri Apple, sem iðulega er sæmdur titli tækninörds, kemur fyrir í 141. sæti á sama niðurstöðulista, og sjónvarpspersónan Ross Geller, úr Vinum, í 154. sæti. Í fyrsta sæti trónir hins vegar tyrknesk söngkona, sem hefur gefið út plötuna Nerde. Í toppsætunum er jafnframt að finna leikara og tökustað úr myndinni Revenge of the Nerds.