Íslenska áralaginu teflt gegn því færeyska

„Við á Finsen landshöfðingja förum með hinu hefðbundna íslenska lagi,” segir siglingameistarinn Ísleifur Friðriksson.

Mikill hiti og kapp er nú að færast í fyrirhugaða róðrakeppni sem að venju er haldin á sjómannadaginn, að þessu sinni þann 3. júní, og má búast við meiri keppni en oftast áður. Fréttablaðið hefur þegar greint frá því að hin sigursæla sveit færeyska saumaklúbbsins Stokkarnir ætlar ekki að gefa hlut sinn. Og JPV útgáfan ætlar að mæta til leiks með vaska róðrasveit. Og nú hefur Siglunes, Siglingaklúbburinn í Nauthólsvík, ákveðið að mynda lið og er ætlunin að veita Stokkunum maklega keppni.

„Já, við ákváðum að taka til ára okkar,” segir Ísleifur en þess bera að geta að Ísleifur hefur einmitt þjálfað þau lið, ef undanskildum Stokkunum, enda þaulvanur siglingamaður. Hann neitar því þó alfarið að hafa kennt þeim skakkt áralag til að auka möguleika sína. Ísleifur segir mikla vakningu í kringum þessa fínu íþrótt og nú verði róðurinn hugsanlega vitrænni því Sjómannadagsráð hafi ákveðið að hafa einn keppnisbát á sjó yfir sumarið til að lið geti æft á slíkum.

„Þær eru nokkrar tegundir af áralagi. Færeyingar hafa allt annað áralag en Íslendingar. Hafnleysurnar hérna þýddu að menn þurftu að leggjast meira á árarnar. Þetta er meiri handavinna í Færeyjum.”

Sjómennirnir og frystihúsafólki hefur látið undir höfuð leggjast að taka þátt undanfarin ár en vakning er hins vegar á ólíklegustu stöðum öðrum. Lið Finsens skipa þau Jónína dela Rosa sem er formaður, í austurrúmi sitja þeir Óttar Hrafnkelsson og Kjartan Iversen, á miðþóftinni Kolbrún Vaka Helgadóttir og Jóhanna Klara Stefánsdóttir og í andófi eru Ísleifur Friðriksson og Freysteinn Oddsson.