Cowell öskrar eigið nafn í rúminu

Idol-dómarinn Paula Abdul gerir kollega sínum Simon Cowell stóran grikk í heimildarþætti um þann síðarnefnda sem sýndur verður í Bretlandi um helgina. Brot úr þættinum hafa lekið út til fjölmiðla og talar Abdul þar meðal annars um hið margfræga sjálfsálit Cowell og hvernig það endurspeglast í kynlífi kappans.

„Hann er eini maðurinn sem ég veit um sem æpir eigið nafn á meðan bólförum stendur. Hans hugmynd að forleik er að horfa á sjálfan sig í spegli,“ segir Abdul. Talið er að þessi ummæli muni koma Cowell afar illa og þykir ekki útilokað að lögfræðingar hans muni fara fram á að ummælin verði fjarlægð úr endanlegri útgáfu þáttarins.

Í myndinni er einnig haft eftir eldri bróður Simon, Tony Cowell, að hann hafi málað sig með hvítgráum húðlit á sínum yngri árum til að sleppa við að fara í skólann. „Þannig leit hann út fyrir að vera fölur og slappur og þá leyfðu mamma og pabbi honum að sleppa við skólann,“ segir Tony.