Ásakanir um leynimakk og bakdyrasamruna

Trúnaður hefur ríkt um störf stýrihópsins síða hann tók til starfa. Í vinnuskjali sem fréttastofa Stöðvar tvö hefur fengið aðgang að eru lagðar fram sáttatillögur um framtíð orkuveitunnar í kjölfar þess að samruna Geysir Green Energy og Reykavík Energy Invest var hafnað.

Þar er meðal annars lagt til að öll starfsemi orkuveitunnar sem ekki fellur undir grunnstarfsemi verði flutt í önnur félög eins og segir í skjalinu. Þá er lagt til að Reykjavik Energy Invest verði fjárfestingararmur Orkuveitunnar og að fullu í hennar eigu.

Lagt er til að hlutur Orkuveitu Reykjavíkur í Hitaveitu Suðurnesja verði fluttur inn í REI og síðan seldur Geysir Green Energy sem greiðir fyrir með hlutabréfum. Það sama gildir um eignarhlut Hafnarfjarðarbæjar í Hitaveitu suðurnesja fari svo bærinn selji orkuveitunni sinn hlut. Sérstaklega er tekið fram í skjalinu að hlutur Reykjavík Energy Invest í Geysir Green Energy megi aldrei vera minni en 15 prósent og ekki meiri en 25 prósent.

Gísli Marteinn Baldursson, borgarfulltrúi Sjálfstæðisflokks, segir tillöguna ekki hafa verið mótaða af stýrihópnum og hafa komið á óvart.

Gísli segist ekki vilja fjalla um skjalið sjálft þar sem hann líti svo á að hann sé bundinn trúnaði. „Þarna virðist vera um einhvers konar bakdyrasamruna að ræða sem er vont fyrir alla aðila."

Óskar Bergsson, varaborgarfulltrúi Framsóknarflokksins sem einnig á sæti í stýrihópnum, vísaði því á bug í samtali við fréttastofu Stöðvar 2 að um einhvers konar bakdyrasamruna væri að ræða. Hann segir einungis um tillögur að ræða sem enn séu í vinnslu og að þær verði kynntar opinberlega að henni lokinni.