Baðst fyrirgefningar á vopnuðu ráni í Mávahlíð

"Hann ætlar aldrei að gera þetta aftur," segir Þórður Björnsson verslunarmaður í Sunnubúðinni í Mávahlíð en einn þeirra þriggja sem rændu búð hans á sunnudag, vopnaðir kylfu og öxi, kom á fund hans í dag til að biðjast fyrirgefningar á gjörðum sínum.

Þórður segir að ræninginn, sem aðeins er 16 ára gamall, hafi verið fullur iðrunar og lofað bót og betrun. Hann kom í búðina í morgun ásamt móður sinni. Annar af ræningjunum, sem einnig er 16 ára hefur einnig boðað komu sína í Sunnubúð til að ná tali af Þórði og biðjast fyrirgefningar.

Þórður segir fund morgunsins hafa gengið vel. Hann segist sjálfur allur vera að koma til eftir atburði helgarinnar en hann lýsti því í samtali við Vísi á Sunnudag þegar þrír grímuklæddir menn rændu um 80 þúsund krónum úr verslun hans.

Lögreglan handtók mennina síðar um daginn, fjóra 16 ára karlmenn.