Sjálfstætt starfandi talmeinafræðingar segja upp samningi við TR

Allir sjálfstætt starfandi talmeinafræðingar á Reykjavíkursvæðinu nema einn, eða 19 talsins, hafa sagt sig frá samninga við Tryggingastofnun ríkisins vegna óánægju með samskipti við stofnunina. Segja þeir stofnuna fara offari í eftirliti sínu og standa ófaglega að því. Þetta kemur fram í tilkynningu frá Félagi talkennara og talmeinafræðinga.

Þar segir enn fremur að uppsagnirnar hafi þegar tekið gildi. Skjólstæðingar talmeinafræðinganna geti því ekki vænst endurgreiðslu frá Tryggingastofnun ríkisins fyrir störf þeirra.

Meðal skjólstæðinga talmeinafræðinganna eru börn með veruleg frávik í málþroska, einhverf börn, sjúklingar sem hafa fengið málstol vegna heilaskaða og börn sem hafa fengið kuðungsígrædd heyrnartæki vegna alvarlegrar heyrnarskerðingar eða heyrnarleysis. Bent er á að um sex hundruð börn séu á biðlistum hjá sjálfstætt starfandi talmeinafræðingum og þörf fyrir þjónustuna sé mjög brýn.

„Félag talkennara og talmeinafræðinga harmar mjög þá stöðu sem komin er upp í samskiptum við Tryggingstofnun ríkisins. Rótin að samskiptaerfiðleikunum liggur hjá Tryggingastofnun og hún er þeim kunn. Félag talkennara og talmeinafræðinga mun ekki ganga til viðræðna við samninganefnd Tryggingastofnunar fyrr en lagðar hafa verið fram verklagsreglur Eftirlits TR. Reglur þessar þurfa að vera skýrar og báðum aðilum kunnar," segir í tilkynningunni.