Fíkniefnabrotum fjölgaði um 25% á milli ára

Árið 2006 voru 9.666 hegningarlagabrot tilkynnt til lögreglunnar á höfuðborgarsvæðinu. Þetta er töluverð aukning frá árinu á undan þegar 7.742 brot voru skráð. Þetta kemur fram í skýrslu lögreglunnar á höfuðborgarsvæðinu sem unnin var af Rannveigu Þórisdóttur og Benjamín Gíslasyni.



Árið 2006 voru 828 ofbeldisbrot kærð og er það um 16 prósent aukning frá árinu 2005. Mest aukning var í minniháttar líkamsárásum eða um 27 prósent. Hins vegar fækkaði meiriháttar og stórfelldum líkamsárásum um 42 prósent. Líkamsárásum, líkamsmeiðingum af gáleysi fækkaði einnig um 78 prósent.

Fíkniefnabrotum fjölgarHeildarfjöldi fíkniefnabrota jókst talsvert á milli áranna 2005 og 2006, eða úr 1.111 fíkniefnabrotum árið 2005 í 1.398 brot árið 2006. Þetta er aukning um 25 prósent á milli ára. Mesta aukningin var í vörslu og meðferð ávana- og fíkniefna en þeim fjölgaði úr 958 málum árið 2005 í 1.228 mál árið 2006 sem er 28 prósent aukning á milli ára. Auðgunarbrotum fjölgarFjöldi auðgunarbrota jókst um rúm 14 prósent á milli áranna 2005 og 2006. Mest var aukning í þjófnaðarmálum og þá sérstaklega þjófnaði á reiðhjólum sem jókst um 127 prósent á milli ára. Vera má að breytingar í skráningu skýri þetta en árið 2005 var byrjað að flokka þjófnaðarbrot nánar eftir því hverju var stolið. Innbrotum fjölgaði einnig nokkuð milli áranna 2005 og 2006 og alls voru kærð 1.916 innbrot á höfuðborgarsvæðinu árið 2006 sem er aukning um tæp 9 prósent á milli ára. Íbúar á höfuðborgarsvæðinu eru öruggirRannsóknin bendir til þess að meirihluti íbúa á höfuðborgarsvæðinu, eða rúmlega 90 prósent, eru mjög eða frekar öruggir þegar þeir eru á gangi í hverfum sínum að næturlagi. Konur eru hræddari við að vera einar á gangi en karlar og er það í takt við niðurstöður eldri rannsókna. Íbúar Grafarvogs telja sig einna öruggasta á gangi í sínu hverfi en íbúar Breiðholts og Miðborgar telja sig hins vegar einna óöruggasta á gangi eftir að myrkur er skollið á.



Unnt er að hlaða niður skýrslu lögreglunnar ef smellt er á hlekkinn hér að neðan. Skýrslan er á pdf sniði.