Kannað hvort hægt sé að reisa nýtt sjúkrahús á hagkvæmari hátt

Ný nefnd sem heilbrigðisráðherra skipaði í haust um fasteignir, nýbyggingar og aðstöðu heilbrigðisstofnana á að kanna hvort hægt verði að reisa nýtt háskólasjúkrahús með hagkvæmari hætti en núverandi áætlanir miðast við.

Þetta kemur fram í svari Guðlaugs Þórs Þórðarsonar heilbrigðisráðherra við fyrirspurn Sivjar Friðleifsdóttur, þingmanns Framsóknarflokksins og fyrrverandi heilbrigðisráðherra.

Siv spurði meðal annars hvort stefnubreyting hefði orðið varðandi uppbyggingu sjúkrahúss í Vatnsmýrinni. Guðlaugur svaraði því til að engar ákvarðanir hefðu verið teknar um stefnubreytingu en nefndin sem skipuð var í haust undir forystu Ingu Jónu Þórðardóttur myndi taka út stöðu verkefnisins og að þeirri úttekt lokinni myndi hann kynna hvort ástæða væri til að breyta þeim ákvörðunum sem teknar voru á sínum tíma.