Minnihluti vildi fresta afgreiðslu Grímseyjarferjumáls

Minnihlutinn í fjárlaganefnd Alþingis vildi að nefndin frestaði fullnaðarafgreiðslu á greinargerð Ríkisendurskoðunar vegna Grímseyjarferju samkvæmt áliti sem skilað var í dag. Fjallað var um málið á fundi nefndarinnar í morgun og skilaði meirihlutinn skýrslu um málið.

Fram kemur í áliti minnihluta Framsóknarflokksins, Vinstri - grænna og Frjálslynda flokksins að frá því að greinargerð Ríkisendurskoðunar hafi litið dagsins ljós hafi verið alvarlegur ágreiningur milli fjármálaráðherra og Ríkisendurskoðunar um hvort ráðherrann hafi haft heimild til þess að ávísa á greiðslur úr ríkissjóði vegna kostnaðar við ferjuna. Fjárlaganefnd eigi að taka afstöðu í málinu enda lúti það meðal annars að grundvallaratriðum í stjórnskipan landsins og mögulegum rétti framkvæmdavaldsins til að taka í eigin hendur það fjárveitingavald sem lög kveða á um að Alþingi fari með.

Þá segir meðal annars í áliti þeirra Bjarna Harðarsonar, Jóns Bjarnasonar og Grétars Mars Jónssonar að enn sé óljóst hvert verði heildarumfang og kostnaður endurbótanna á ferjunni. Hjá nefndinni liggi heldur ekki fyrir tímasetning um verklok og áhöld eru um hvort ferjan hæfi yfirhöfuð þeirri þjónustu sem henni er ætlað í siglingum til og frá Grímsey.

Enn fremur segir minnihlutinn að varast beri að taka undir með fullyrðingum fjármálaráðherra um að umrætt verklag við framkvæmd fjárlaga eigi sér mörg fordæmi og sé í samræmi við gildandi reglur. Þá sé verið að ganga gegn alvarlegum athugasemdum Ríkisendurskoðunar.

Þremenningarnir lögðu fram tillögur í fimm liðum í málinu sem meirihlutinn hafnaði. Í þeim fólst meðal annars að fleiri aðilar yrðu kallaðir á fund fjárlaganefndar, þar á meðal fulltrúar Grímseyinga, ráðgjafarfyrirtækisins og Skipasmíðastöðvarinnar Orms og Víglundar. Þá vildi minnihlutinn að fulltrúar úr áhöfn núverandi Grímseyjarferju gæfu umsögn um hæfi ferjunnar og að gert yrði formlegt lögfræðiáliti vegna ágreinings fjármálaráðherra og ríkisendurskoðanda á túlkun fjárreiðulaga.