Ungur drengur stórslasaður eftir fimm metra fall

Lítill drengur stórslasaðist við gamla Blómavalshúsið í fyrradag. Hann var að príla upp á þaki hússins og féll þar niður um fimm metra að því er talið er. Svo virðist sem drengurinn hafi fallið niður þegar gler á þaki hússins gaf sig. Hann var fluttur á gjörgæslu en er nú úr lífshættu og dvelur á Barnaspítala Hringsins.

Lögreglan segir að vanda þurfi frágang á yfirgefnum húsum. Þau geti alltaf verið hættuleg. Gamla Blómavalshúsið stendur autt eins og sakir standa.

Húsið er í eigu byggingafyrirtækisins Eyktar. Gunnar Valur Gíslason, forstjóri Eyktar, segist harma að slysið hafi orðið. Hann segir að svæðið verði afgirt. „Ég get ekki sagt hvenær verður búið að girða þetta af en það verður bara gert eins fljótt og hægt er," segir Gunnar. Gunnar segir að til standi að rífa húsin fljótlega því byggt verði á svæðinu. Hann segir að þetta sé fyrsta slys sem Eykt hafi verið tilkynnt um á þessu svæði. Gunnar segir að Eykt hafi ekki verið krafið um skaðabætur vegna slyssins. Það sé hins vegar aukaatriði. „Það sem skiptir máli er að drengurinn slasaðist ekki alvarlega," segir Gunnar.