Segir samgöngubyltingu í uppsiglingu á Íslandi

Bandaríska fréttastöðin CNN fjallar um vetnisverkefni hér á landi í nýju myndskeiði og segir að samgöngubylting sé í uppsiglingu.

Í fréttinni er meðal annars rætt við Ásdísi Kristinsdóttur hjá Orkuveitu Reykjavíkur þar sem hún útskýrir virkni vetnisbíls sem hún ekur.

Fram kemur í innslaginu að vatnsföll, eldfjöll og hverir sjái Íslendingum fyrir nægu rafmagni og að landið sé í kjörstöðu til þess að verða fyrsta vetnishagkerfið. Enn fremur er rætt við Braga Árnason, fyrrverandi prófessor, sem nefndur er prófessor Vetni í fréttinni. Hann bendir á að Íslendingar eigi nóg af ódýrri vatns- og jarðvarmaorku og að þeir séu aðeins búnir að nýta um níu prósent af mögulegri raforku í landinu.

Fjallað er stuttlega um vetnisverkefni Strætós og sagt að 30-40 vetnisbílar verði á götum Reykjavíkur í lok árs. Þá sé stefnt að því að árið 2010 verði vetnisbílar komnir í almenna sölu. Með því geti Ísland losað sig við jarðefnaeldsneyti á nokkrum áratugum.

Myndbrotið má sjá hér.