Segir nefndina hafa staðið sig í stykkinu

„Ja, bæði og," segir Alfreð Þorsteinsson aðspurður hvort ákvörðun heilbrigðisráðherra um að leggja niður framkvæmdanefnd nýs háskólasjúkrahús hafi komið sér á óvart. „Það er auðvitað kominn nýr ráðherra í heilbrigðisráðuneytið og hann hefur sjálfsagt ákveðnar skoðanir á þessari framkvæmd. Ég held að hann verði að skýra þetta sjálfur út."

Alfreð segir að ekki sé hægt að saka nefndina um að hafa ekki unnið sitt verk. „Verkið gengur vel og afar gott samstarf hefur verið með nefndarmönnum og starfsfólki spítalans. Þá höfum við einnig átt mjög gott samstarf við borgaryfirvöld," segir Alfreð. „Það getur því ekki verið ástæða að nefndin hafi ekki staðið sig í stykkinu. Þá hefur starfið innan nefndarinnar einnig gengið vel og ég hef átt mjög gott samstarf við nefndarmenn ekki síst Ingu Jónu Þórðardóttur, varaformann."

Aðspurður hvort hætta sé á því að bygging spítalans tefjist af þessum völdum segir Alfreð ákveðna hættu á því. „Það segir sig sjálft að það verði einhverjar tafir en vonandi ekki miklar." Alfreð segir afar mikilvægt að verkinu ljúki á áætlun. Starf hans í nefndinni hafi sannfært hann um að Íslendingar séu komnir töluvert á eftir nágrannalöndum hvað varðar aðbúnað á spítölum.

Alfreð segist ekki óttast atvinnuleysi en hann var í fullu starfi sem formaður nefndarinnar og framkvæmdastjóri verksins. „Ég er með margt í spilunum og með næg verkefni," segir hann.

Hann segist eiga eftir að ræða um starfslok sín við ráðuneytið og hvort einhverskonar starfslokasamningur verði gerður. „Ég er ekki farinn að hugsa út í þau mál að svo stöddu," segir Alfreð Þorsteinsson, fráfarandi formaður framkvæmdanefndar um byggingu nýs háskólasjúkrahúss.

Áætlað er að verklegar framkvæmdir við sjúkrahúsið hefjist árið 2009.