Íslenskt fyrirtæki stjórnar orkusparnaði í Evrópu

Íslendingar eru þekktari fyrir að sóa en spara. Þrátt fyrir það stjórnar íslenskt fyrirtæki orkusparnaði víða í Evrópu frá húsakynnum sínum í Mosfellsbæ.

Fyrirtækið DomesticSoft í Mosfellsbæ sérhæfir sig í orkusparnaði og sér meðal annars um götulýsingu og orkunotkun á nokkrum stöðum í Evrópu. Meðal annars götulýsingu í hluta Amsterdam í Hollandi, Luxemborg og Berlín.

Hugbúnaðurinn er hannaður af fyrirtækinu en vélbúnaður í samvinnu við erlenda aðila. Raforkunotkun er stjórnað frá tölvum á Íslandi í gegnum internetið. Þannig hefur hugbúnaðurinn samskipti við ljósastaura og vélbúnað bygginga og stýrir þannig notkuninni.

Þröstur Jónsson framkvæmdastjóri DomesticSoft segir lýsingu vera góða við hringtorg þar sem slysahætta sé fyrir hendi en deyfist síðan. Þá sé góð lýsing um helgar við bari þar sem áflogahætta er.

Raforka er dýrari í flestum Evrópulöndum en á Íslandi. Sums staðar er orkuskortur að verða áberandi og ekki auðvelt að auka framleiðslu. Þess vegna skiptir afar miklu máli að þessum verðmætum sé ekki sóað.

Allt að 30 prósenta orkusparnaður hefur náðst í verkefnum fyrirtækisins, en frekar algengt er að í byggingum sé verið að kynda á sama tíma og loftkæling er í gangi. Í Asker í Noregi þar sem fyrirtækið sér um orkustýringu á öllum opinberum fyrirtækjum og skólum hefur orkunotkun dregist saman um átján prósent. Þá er fyrirtækið með verkefni í Bretlandi og á Írlandi.

Þröstur segir að nú sé í gangi tilraunaverkefni með götulýsingu hér á landi, en þegar hann kynnti hugmyndir um orkusparnað fyrir nokkrum árum hafi þær ekki fengið góðan hljómgrunn.

Íslendingar séu þekktir fyrir að sóa frekar en spara, en tækifæri til orkusparnaðar liggi í götulýsingum.