Landsvirkjun segir öll leyfi vegna Gjástykkis löngu komin

Landsvirkjun hefur sent frá sér tilkynningu þar sem segir að fyrirtækið harmi að Landvernd og Samtök um náttúruvernd á Norðurlandi skuli hafa beðið um opinbera rannsókn á rannnsóknarleyfisveitingu á Gjástykkissvæðinu. Öll leyfi, og umsagnir, vegna þessa hafi fyrir löngu verið komin fram.

Landsvirkjun segir að sótt hafi verið um rannsóknarleyfi á Gjástykkissvæðinu í október 2004 í samræmi við lög og var þá þegar leitað umsagna umsagnaraðila, sem sendu þær til iðnaðarráðuneytisins. Afgreiðsla málsins tafðist um hríð vegna leyfisumsókna annarra aðila. Þegar samið hafði verið við landeigendur var leyfisbeiðni ítrekuð í september 2006, en þá lágu fyrir jákvæðar umsagnir allra umsagnaraðila.

Málinu var síðan slegið á frest vegna fyrirhugaðra lagabreytinga, sem ekki náðu fram að ganga á vorþinginu 2007. Þá ítrekaði Landsvirkjun umsókn sína með bréfi hinn 8. maí og veitti iðnaðarráðherra leyfið hinn 10. maí tveimur og hálfu ári eftir að óskað var eftir leyfinu enda öllum lagaskilyrðum fullnægt.

"Landsvirkjun harmar að Landvernd og Samtök um náttúruvernd á Norðurlandi skuli senda þingnefndum og fjölmiðlum bréf og biðja um opinbera rannsókn án þess að kynna sér málavexti. Ljóst er að rannsóknarleyfið er gefið út á grundvelli laga og lögboðinna umsagna. Landsvirkjun mun senda viðkomandi aðilum greinargerð um málið á næstu dögum," segir í tilkynningu Landsvirkjunnar.