Ekki hægt að misnota áframtengingu úr læstum síma

Síminn hefur sent frá sér tilkynningu vegna fréttar Sjónvarpsins þess efnis að hringt hefði verði í 118 úr síma sem var með læsingu á símtöl í farsíma til þess að fá áframtengingu við farsímanúmer. Segir m.a. í henni að ekki sé hægt að misnota þjónustu 118 á þennan hátt.

"Starfsmenn Já og Símans hafa farið yfir málið. Það er hagur beggja fyrirtækja og viðskiptavina þeirra að ekki sé hægt að misnota þjónustu Já og að læsingar í farsímanúmer gildi líka sé hringt í 118." segir í tilkynningunni.

Tæknibúnaður sem miðlar upplýsingum um læsingar hefur verið lagfærður og nú fær Já allar upplýsingar frá Símanum um læsingu á símtöl í farsíma. Hér eftir verður því ekki hægt að misnota þjónustu fyrirtækisins. Þess ber að geta að að viðskiptavinir Vodafone njóta sömu þjónustu hjá 118.

„Viðskiptavinir okkar geta nú verið óhræddir við að sú þjónusta Já 118 að fá áframtengingu í símanúmer verði ekki misnotuð," segir Sigríður Margrét Oddsdóttir, framkvæmdastjóri Já.