Ríkisskattstjóri boðar róttækar breytingar á skattframtali

Stefnt er að því að gera tilraun með að skattyfirvöld telji fram fyrir ákveðna einstaklinga strax árið 2009. Mögulegt er að skattgreiðendur þurfi að samþykkja framtalið, en einnig er mögulegt að aðhafist þeir ekki teljist þeir hafa samþykkt framtalið óséð.

Eftir er að útfæra þessar hugmyndir nánar segir Skúli Eggert Þórðarson ríkisskattstjóri. Hann hyggst skera upp herör gegn því að einstaklingar skili ekki inn framtali. Á síðasta ári skiluðu 14.500 einstaklingar ekki skattframtali, sem var nokkur aukning frá ári á undan.

„Það getur ekki gengið út frá sjónarmiði skattframkvæmdarinnar að það séu tæplega 15 þúsund manns sem ekki skila skattframtali,“ segir Skúli.

Starfshópur Ríkisskattstjóra og skattstjóra hefur undanfarið fjallað um málið, og verða tillögur hópsins til úrbóta kynntar stjórnvöldum í október. Skúli vill ekki upplýsa um tillögurnar, en boðar róttækar breytingar á því hvernig tekið er á málum einstaklinga og fyrirtækja sem ekki skila framtalsgögnum, nái þær fram að ganga.

Skúli segir hluta þeirra sem ekki skili framtali erlenda starfsmenn sem farnir séu af landi brott þegar komi að því að telja fram. Eðlilegt væri að leggja á þann hóp eftir hendinni, áður en fólkið fer úr landi. Aðrir sem ekki skili verði hugsanlega aðvaraðir áður en gripið verði til þess að áætla á þá opinber gjöld.

Framtíðarlausnin sé þó að losa sem flesta undan framtalsskyldu með því að skattyfirvöld geri framtöl fyrir einstaklinga. „Við treystum okkur ekki til að gera þetta fyrir alla, heldur einungis þá sem uppfylla ákveðin skilyrði,“ segir Skúli.

Eftir einhvern ótilgreindan árafjölda gæti því einstaklingur sem ekki stendur í atvinnurekstri og kaupir hvorki né selur eignir sloppið við að gera framtal, veiti hann skattyfirvöldum heimild til að fá upplýsingar um stöðu á bankareikningum.