Reese Witherspoon og Jake Gyllenhaal nýjasta parið

Óskarsverðlaunaleikkonan Reese Witherspoon gekk í gegnum erfiðan skilnað við fyrrum eiginmann sinn, Ryan Phillippe, á síðasta ári. Það virðist þó að leikkonan sé búin að finna ástina að nýju með leikaranum Jake Gyllenhaal en vinir leikkonunnar segja þau vera í ástarsambandi. People greinir frá þessu.

Reese og Jake voru að ljúka við að leika í spennutryllinum Rendition en áður könnuðust þau við hvort annað í gegn um Ryan Phillippe, en hann og Jake eru gamlir líkamsræktarfélagar. Var parið þó ekki mikið saman í tökum fyrir myndina en þær fóru fram á átta vikna tímabili í Marokkó. Þegar áframhaldandi kvikmyndatökur fóru fram í L.A. vatt Jake sér upp að Reese og kynnti sig formlega fyrir henni. Það var þá sem boltinn fór að rúlla. ,,Hlutirnir fóru smá saman að ganga upp á milli þeirra, en það var ekki það sem Reese bjóst við í byrjun. Hún varð meira skotin í honum með tímanum," sagði náinn vinur leikkonunnar. Það er því vonandi að ástin endist hjá leikaraparinu því það er aldrei að vita hvað gerist þegar fræga fólkið er annars vegar.