Yfirtökunefnd skortir upplýsingar vegna Glitnisviðskipta

Yfirtökunefnd telur sig ekki vera komna með nægjanlegar upplýsingar til að meta hvort yfirtökuskylda hafi myndast vegna kaupa á 20 prósenta hlut í Glitni á þriðjudag. Nefndin kemur aftur saman til fundar í dag.

Bæði Fjármálaeftirlitið og yfirtökunefnd eru þessa dagana að meta mikil viðskipti með hlutabréf í Glitni upp á tugi milljarða króna. Málið snýst í grófum dráttum um tvennt, það annars vegar hvort nýr leiðandi eignarhlutur hefur myndast í bankanum og hins vegar hvort kaupin séu það mikil hjá einum aðila eða skyldum aðilum að yfirtökuskylda hafi skapast á hlut annarra eigenda.

Ef nýr leiðandi eignarhlutur hefur myndast þarf leyfi til þess frá Fjármálaeftirlitinu, sem kaupendum bar að sækja um, eða hafa fyrirvara um í samningum sínum. Yfirtökunefnd kannar hins vegar hvort yfirtökuskylda hafi myndast. Hún starfar á grundvelli stofnsamnings sem markaðsaðilar gerðu með sér árið 2005. Það eru Samtök fjármálafyrirtækja, viðskiptaráðuneytið, Kauphöllin, Samtök fjárfesta og Seðlabankinn.

Viðar Már Matthíasson, formaður yfirtökunefndar, segir markmið hennar að viðhalda heilbrigðum viðskiptaháttum með verðbréf og til hennar stofnað af aðilum sem hafa hag af því að verðbréfaviðskipti gangi vel fyrir sig.

Hann segir að hingað til hafi aðilar á markaði farið eftir áliti nefndarinnar í einstökum málum. Hann segir nefndina ekki hafa nægar upplýsingar um Glitnisviðskiptin til að leggja fram álit á þeim. Stefnt sé að því að afla nægjanlegra upplýsinga fyrir helgi, þannig að nefndin geti metið hvort ástæða sé til fyrir hana að skoða málið frekar.