Verðandi mæður í Namibíu fá íslenskt húsaskjól

Konur í bænum Engela nyrst í Namibíu geta brátt leitað í mæðraskýli sem byggt verður upp fyrir íslenskt fjármagn. Eftir því sem segir í tilkynningu frá Þróunarsamvinnustofnun Íslands eru framkvæmdir við skýlið þegar hafnar og á það að verða tilbúið í byrjun næsta árs.

Þungaðar konur á síðustu vikum meðgöngu hafa á þessu svæði um margra ára skeið leitað athvarfs undir trjám við vegkant skammt frá sýslusjúkrahúsinu og hefur mörgum ofboðið aðstæður þeirra. Því setti sýslustjórinn á svæðinu á fót fjáröflunarnefnd til þess að ráða bót á vandanum.

Haft er eftir Vilhjálmi Wium, umdæmisstjóra Þróunarsamvinnustofnunar, að engin rúm hafi verið fyrir konurnar á sjúkrahúsinu og fæðingardeildin geti ekki tekið við verðandi mæðrunum fyrr en hríðir hefjast. Því hafi konurnar þurft að bíða við þjóðveginn, oft svo dögum og vikum skiptir. Þá sé þar engin hreinlætisaðstaða og konurnar hafi sofið á pappaspjöldum.

Alls hafa 2,8 milljónir verið afhentar sýslustjóranum til verkefnisins, þar af 300 þúsund króna söfnunarfé til framkvæmdanna frá íbúum Reykjanesbæjar.