Heilbrigðisráðherra gagnrýndur fyrir að styðja áfengisfrumvarpið

Þingmaður Vinstri grænna, Björn Valur Gíslason, fór hörðum orðum um Guðlaug Þór Þórðarson heilbrigðisráðherra í umræðum um störf þingsins. Hann sagði að afstaða ráðherrans til frumvarps, sem á að leyfa einkaaðilum að selja léttvín, veki upp spurningar um hvort ráðherrann sé hæfur til að gegna embætti sínu.

Björn Valur gagnrýndi Guðlaug harðlega og sagði stuðning heilbrigðisráðherrans koma á óvart þar sem stofnanir sem heyra undir hann hafa þegar lýst andstöðu sinni við frumvarpið. Þingmaðurinn fullyrti að ráðherrann hafi með þessari afstöðu sinni ráðist af hörku gegn öllum þeim sem varað hafa við frumvarpinu. Þar á meðal væru stofnanir sem heyri undir heilbrigðisráðherra eins og Landlækni og Lýðheilsustöð. Hann krafðist þess að fá svör við því hvort Guðlaugur njóti trausts ríkisstjórnarinnar í ljósi þessarar afstöðu sinnar.

Guðlaugur Þór sagði sérstakt að koma í ræðustól á eftir þingmanni VG í ljósi þeirra stóru orða sem hann lét falla. Hann sagði eðlilegt að menn hefðu mismunandi skoðanir á málinu. Það væri hins vegar enginn fótur fyrir þeim ásökunum að hann hafi ráðist af hörku að þeim sem talað hafi gegn frumvarpinu.

Sigurður Kári Kristjánsson, fyrsti flutningsmaður umrædds frumvarps, kvaddi sér einnig hljóðs og hann lofaði Guðlaug Þór fyrir að skipta ekki skoðun þótt hann væri orðinn heilbrigðisráðherra. Sigurður benti einnig á þá staðreynd að Guðlaugur Þór hafi flutt sama frumvarp á fyrri þingum og því væri afstaða ráðherrans sönnun á því að hann sýni skoðunum sínum og flokks síns tilhlýðilega virðingu.