Flýtimeðferð í kærumáli Svandísar

Svandís Svavarsdóttir sagði á aukafundi borgarstjórnar í dag að dómsstjóri Héraðsdóms Reykjavíkur hefði samþykkt beiðni lögmanns hennar að veita kæru vegna meints ólögmætis eigendafundar í Orkuveitu Reykjavíkur flýtimeðferð. Mun því væntanlega fljótlega birtast stefna í þessu máli.

Þá upplýsti Svandís um það að umboðsmaður Alþingis hefur sent borgarfulltrúum í Reykjavík og bæjarfulltrúum á Akranesi 12 spurningar sem snúa að samruna REI og Geysis Green Energy.

Svandís segir að við sameiningu fyrirtækjanna  hafi verið farið á svig við reglur og samþykktir sem séu settar til að standa vörð um hagsmuni almennings. Svandís segir stjórnunaraðferðirnar í Orkuveitunni óboðlegar og að meirihlutinn í borgarstjórn beri ekki virðingu fyrir borgarbúum.

„Það verður að axla pólitíska ábyrgð gagnvart Reykvíkingum. Hver ætlar að gera það? Og hvernig verður það gert?," spurði Svandís.