Gæslan kannar aðstæður á Jan Mayen

Georg Lárusson, forstjóri Landhelgisgæslunnar, og hópur starfsmanna Gæslunnar heimsóttu í liðinni viku Jan Mayen og kynntu sér búnað á staðnum.

Markmið ferðarinnar var einnig að kom á tengslum og samstarfi milli Landhelgisgæslunnar og stöðvarinnar á Jan Mayen sem heyrir undir Noreg. Fram kemur í tilkynningu frá Landhelgisgæslunni að á Jan Mayen starfi nú 18 manns sem sjá um að reka veðurathugunarstöð, Loran-stöð og viðhalda innri starfsemi eyjunnar.

Þá könnuðu Gæslumenn aðstæður til aðflugs og brottflugs fyrir F-27 flugvél og þyrlur stofnunarinnar ásamt því að athuga möguleika á eldsneytistöku á staðnum. Tilgangurinn er að geta notað Jan Mayen til millilendingar og eldsneytistöku í neyð við leit- og eða björgun.