Hjálpræðisherinn opnar dagsetur fyrir heimilislausa

Hjálpræðisherinn undirbýr nú stofnun dagseturs fyrir heimilislausa menn sem verður staðsett á Eyjarslóð á Granda.

Anna María Reinholtsen, umdæmisstjóri Hjálpræðishersins á Íslandi, segir að þarna verði bókasafn og ýmis tómstundarúrræði, auk sturtuaðstöðu og aðstöðu til að þvo föt. Því ættu að vera næg úrræði fyrir heimilislausa á daginn.

Anna segir að þarna sé gott pláss og því ætti að vera hægt að taka á móti mörgum gestum en ekki sé gert ráð fyrir að þeir verði þarna í gistingu.

Hjálpræðisherinn hefur ekki samið við opinbera aðila um þátttöku í fjármögnun á starfsemi dagsetursins en til stendur að reka nytjamarkað til að fjármagna starfsemina.

Stefnt er að því að dagsetrið verði opnað í nóvember.