Launaleynd afnumin og Jafnréttisstofa efld

Launaleynd verður afnumin og eftirlit Jafnréttisstofu verður eflt ef frumvarp um jafna stöðu og jafnan rétt karla og kvenna verður að lögum. Ríkisstjórnin hefur samþykkt frumvarpið sem nú er til umfjöllunar í þingflokkum stjírnamálaflokkanna.

Það var Jóhanna Sigurðardóttir félagsmálaráðherra sem lagði frumvarpið fram á sínum tíma en það hefur tekið nokkrum breytingum frá fyrstu dögum þess.

Þverpólitísk nefnd undir forystu Guðrúnar Erlendsdóttur, fyrrverandi hæstaréttardómara, skilaði áliti sínu í mars síðastliðnum og byggist frumvarpið í meginatriðum á niðurstöðum nefndarinnar.

Um er að ræða ný heildarlög og eru nokkur nýmæli í frumvarpinu frá gildandi lögum. Í því er meðal annars lagt til að samningsbundin launaleynd verði afnumin og að jafnhliða jafnréttisáætlun sem fyrirtækjum er skylt að gera skuli fylgja framkvæmdaráætlun þar sem fram kemur hvernig fyrirtækin hyggist framfylgja áætlun sinni.

Þá verða heimildir Jafnréttisstofu til að fylgjast með framkvæmd laganna efldar og úrskurðir kærunefndar jafnréttismála gerðar bindandi. Jafnréttisstofa mun síðan hafa heimild til að beita fyrirtækjum dagsektum ef þau fara ekki að lögum.