Kaupréttarsamningar ekki við hæfi

Lykilstjórnendur í Orkuveitu Reykjavíkur gætu misst vinnuna fyrir að hafa ekki upplýst borgarfulltrúa með nægilega glöggum hætti um kaupréttarsamninga og fleira í aðdraganda sameiningar REI og Geysis Green Energy. Heilbrigðisráðherra, sem var hvatamaður að stofnun REI, segir kaupréttarsamningana ekki við hæfi.

DV heldur því fram í dag að Sjálfstæðismenn vilji reka Guðmund Þóroddsson sem var forstjóri Orkuveitunnar þar til hann fékk tímabundið leyfi til að gerast forstjóri hins nýstækkaða Reykjavík Energy Invest.

Af samtölum fréttastofu Stöðvar 2 við borgarfulltrúa í dag að dæma má telja líklegt að einhverjir hjá Orkuveitunni missi vinnunna. Sjálfstæðismenn í borginni eru harðir á því að lykilstjórnendur, en nöfn Guðmundar og Hjörleifs Kvaran komu upp í því samhengi, hefðu brugðist í að upplýsa borgarfulltrúa.

Báðir þessir menn áttu að fá ríflegan kauprétt í REI og höfðu því gríðarlegra fjárhagslegra hagsmuna að gæta þegar þeir kynntu málið fyrir borgarfulltrúum sjálfstæðismanna í síðustu viku. Af þessum fjárhagslegu hagsmunum vissu borgarfulltrúarnir hins vegar ekki. Aðrir segja að Guðmundur hafi ekkert gert af sér.

Guðlaugur Þór Þórðarson, nú heilbrigðisráðherra, var stjórnarformaður Orkuveitunnar þegar REI var stofnað og hafði frumkvæði að því. Hann hefur hingað til neitað að tjá sig við Stöð tvö um málið.

Stofnun REI voru ekki mistök, segir Guðlaugur og vildi ekki tjá sig um þá ákvörðun Sjálfstæðismanna að selja hlut Orkuveitunnar í REI. En hann kveðst ósáttur við kaupréttarsamningana.