Forsetinn við opnun höfuðstöðva IAE

Ólafur Ragnar Grímsson, forseti Íslands, verður viðstaddur opnun höfuðstöðva orkuútrásarfyrirtækisins Iceland America Energy í Bandaríkjunum á föstudag eftir því sem fram kemur í tilkynningu frá félaginu.

Höfuðstöðvarnar verða í miðborg Los Angeles og viðstaddir athöfnina auk forsetans verða forseti borgarstjórnar Los Angeles ásamt Gil Cedillo, öldungardeildarþingmanns Kaliforníu, og forsvarsmönnum fyrirtækisins.

Meðal eigenda Iceland America Energy er íslenska fyrirtækið Enex sem meðal annars er í eigu hins umdeilda Reykjavik Energy Invest og Landsvirkjunar. Þá á bandaríska ráðgjafarfyrirtækið Feanaro hlut í Iceland America ásamt lögfræðifirmanu Dongell Lawrence Finney og Magnúsi Jóhannessyni, sem er forstjóri fyrirtækisins.

Þá koma Jarðboranir, Íslenskar orkurannsóknir og VGK Verkfræðistofa að íslensk-bandaríska fyrirtækinu sem undirverktakar eftir því sem segir á heimasíðu þess.

Iceland America hefur þegar hafið undirbúning að jarðvarmavirkjun í Truckhaven í Kaliforníu þar sem ætlunin er að reisa 50 megavatta virkjun. Þá segist félagið hafa skoðað 26 aðra möguleika en ekkert annað sé fast í hendi.

Í tilkynningu vegna opnunar höfuðstöðvanna segir að endurnýjanlegir orkugjafar muni skipa stórt hlutverk í orkuþörf Norður-Ameríku í framtíðinni, þar á meðal í Kailforníu. Jarðvarmaorka sé sjálbær orkulind sem enn eigi eftir að nýta. Ísland hafi verið í forystu í 70 ár í jarðvarmaorkuvinnslu og að Iceland American komi með þá reynslu til Norður-Ameríku.