Sköpunarkrafturinn virkjaður

Bandaríska stórsveitin Incubus heldur risatónleika í Laugardalshöllinni í kvöld. Steinþór Helgi Arnsteinsson bjallaði í gítarleikarann hárprúða Mike Einzeiger og ræddi við hann um nu-metalinn, af hverju hann fílar ekki hip-hop og fleira.

Incubus á langa og farsæla sögu að baki þrátt fyrir að hafa upplifað tímana tvenna. Sveitin var stofnuð af Mike, Brandon Boyd og Jose Pasillas þegar þeir félagar voru aðeins fimmtán ára gamlir en þeir eru allir enn í fullu fjöri með sveitinni. Nýjasta plata hljómsveitarinnar, Light Grenades (þeirra sjötta í röðinni), fór rakleiðis í fyrsta sæti Billboard-listans í lok síðasta árs og sveitin lauk nýverið við tónleikaferð um Bandaríkin og Kanada en miðar á hana seldust upp á einum degi.

Mike var staddur á heimili sínu í Malibu og hvíldi lúin bein fyrir næsta verkefni eftir fyrrnefnda tónleikaferð þegar Fréttablaðið náði tali af honum. Næsta verkefni er einmittt Ísland sem Mike hlakkar, venju samkvæmt, mikið til. „Ég hef heyrt að þar séu mjög fallegir jöklar, eldfjöll og konur... og já, karlmenn líka. Ég hef líka heyrt að það sé mjög virkt lista- og tónlistarlíf í landinu, mikið að gerast og virðist spennandi,“ útskýrir Mike galvaskur.

Þegar sveitin var að stíga sín fyrstu spor á stjörnuhimni bandarísku rokksenunnar var sveitin iðulega flokkuð með nu-metal sveitum á borð við Korn, Deftones og jafnvel Limp Bizkit. Mike er reyndar ekkert sérstaklega ósáttur við flokkunina enda segir hann að þetta hafi verið það vinsælasta á sínum tíma og að allir tónlistarblaðamenn hafi verið sólgnir í stefnuna. „Núna, hins vegar, láta margar af þessum sveitum og blaðamönnum eins og þetta hafi aldrei átt sér stað, eins og þeim hafi aldrei líkað við þessa tónlist á þeim tíma.“

Þegar Mike er spurður hvort honum hafi fundist hinar nu-metal sveitirnar beinlínist vondar er hann ekki alveg tilbúinn að samþykkja það skilyrðislaust en bendir samt á þá staðreynd að flestar þeirra séu nú hættar og þá væntanlega af ástæðu. „Ég held að okkar tónlist hafi ekki átt svo mikið sameiginlegt með þessum sveitum, því annars hefðum við ekki náð að lifa svona lengi. Mér er samt illa við að segja vonda hluti um aðrar hljómsveitir. Ég lít samt ekki upp til þessarar tegundar tónlistar. Ég er til dæmis heldur ekkert hrifinn af hip-hop tónlist.“

Aðspurður hvað honum líki hins vegar við nefnir Mike meðal annars fönk og soul, sem eru einmitt forverar hip-hops. Á Mike kannski sameiginlegt með hip-hoppi að koma frá sömu rótunum? Hann samþykkir það reyndar en segir að þrátt fyrir það sé hip-hop einfaldlega ekki hluti af hans tónlistarlega orðaforða.

Eftir örlítið meira þras um nu-metalinn, hip-hop og fönk er röðin komin að nýju plötunni, Light Grenades. Nafnið segir Mike að sé meira tilvitnun í sprengingu hugmynda og sköpunargleði heldur en andstríðsáróður, sem þó megi túlka á einhvern hátt í nafninu og á plötunni. En hver eru næstu skref Incubus? „Ég veit ekki alveg, við erum kannski ekki byrjaðir að þróa með okkur hugmyndir um næstu plötu. Við erum eingöngu nýbyrjaðir að fylgja nýju plötunni eftir.

Það þarf miklu orku til þess að búa til plötu og ég þarf að geta einbeitt mér almennilega að henni. Þessa stundina erum við einfaldlega að einbeita okkur að næstu verkefnum,“ segir Mike. Að því búnu er honum sleppt við frekari spurningar enda betra að hafa manninn vel úthvíldan og einbeittan fyrir tónleikana í kvöld en húsið verður opnað klukkan 20.00 og sjá Mínus-menn um upphitunina. Þegar þetta er skrifað eru enn til örfáir miðar á tónleikana en óseldir miðar verða fáanlegir eftir hádegi í dag í Laugardalshöll.