„Kristinn H. er Þrándur í Götu“

Sigurjón Þórðarson, fyrrverandi þingmaður Frjálslynda flokksins segir að Kristinn H. Gunnarsson hafi sagt þvert nei við því að Sigurjón yrði gerður að framkvæmdastjóra flokksins. Magnús Reynir Guðmundsson var í gærkvöldi ráðinn framkvæmdastjóri en Sigurjón segir að sér hafi verið lofuð staðan eftir kosningar. Það hafi ekki gengið eftir vegna andstöðu ákveðinna flokksmanna og tiltekur Sigurjón Kristinn H. Gunnarsson sérstaklega.

Sigurjón segir að síðan hafi komið fram sáttatillaga í málinu frá forystu flokksins sem Guðjón Arnar formaður hafi stutt. „Hún gekk út á að ég tæki við starfinu fyrsta janúar 2009, en tillagan náði ekki fram að ganga í framkvæmdastjórn flokksins."

„Kristinn H. Gunnarsson er Þrándur í götu," segir Sigurjón. „Mér skilst samt að Kristinn hafi sagt þvert nei við því að þessi sáttatillaga næði fram að ganga," segir hann.

Aðspurður hvort Sigurjón sé hættur í flokknum segir hann svo ekki vera og að hann styðji Guðjón Arnar heilshugar áfram. „Ég er í þessum út af málefnunum og ég sé engan annan flokk sem berst gegn þessu fiskveiðistjórnarkerfi. Ég treysti alveg Guðjóni til þess að leysa þetta mál og að menn endurskoði þessa afstöðu sína."