Magnús áfram framkvæmdastjóri frjálslyndra

Magnús Reynir Guðmundsson hefur verið ráðinn framkvæmdastjóri Frjálslynda flokksins og þingflokks Frjálslynda flokksins. Þetta kemur fram í tilkynningu frá Frjálslynda flokknum.

Þá hefur Magnús Þór Hafsteinsson, fyrrverandi þingmaður flokksins, verið ráðinn í hlutastarf fyrir þingflokkinn. Báðir hafa þegar hafið störf.

Eins og fram hefur komið í fréttum hafa verið deilur á milli Sigurjóns Þórðarsonar, fyrrverandi þingmanns flokksins, og stjórnar flokksins um framkvæmdastjórastöðuna. Sigurjón hélt því fram að honum hefði verið lofuð framkvæmdastjórastaðan tæki hann sæti á lista flokksins í Norðausturkjördæmi fyrir síðustu þingkosningar en næði ekki inn á þing. Hann var áður þingmaður í Norðvesturkjördæmi.

Magnús Reynir hefur verið framkvæmdastjóri flokksins frá því að Margrét Sverrisdóttir hvarf úr því embætti í fyrra.