Þegar hafist handa við hagræðingu hjá MS

Guðbrandur Sigurðsson, forstjóri MS, segir að þegar verði hafist handa við hagræðingaraðgerðir sem fjallað var um á fulltrúafundi Auðhumlu, móðurfélags MS, í gær. Hann býst við að til einhverra uppsagna komi.

Eins og greint hefur verið frá er ætlunin að spara um 200 milljónir króna vegna slakrar afkomu félagsins á fyrri helmingi ársins en þá tapaði MS um 180 milljónum króna.

Guðbrandur segir í samtali við Vísi að ýmsar skýringar séu á þessu tapi en meðal annars var ákveðið að lýsa yfir verðstöðvun á mjólk út þetta ár til þess að vinna gegn hærra matarverði. Guðbrandur bendir á að mjólkurverð hafi hækkað um 2,5 prósent á síðustu 4-5 árum á sama tíma og vísitala hafi hækkað um 17 prósent.

„Með hagræðingunni viljum við gera enn betur en við höfum gert. Markmiðið er að nýta enn betur þau tækifæri sem eru til hagræðingar og þetta er í samræmi við stefnu sem við mörkuðum þegar Mjólkursamsalan tók til starfa í byrjun árs. Þetta gerum við til þess að reyna að bæta hag bæði félagsmanna okka og neytenda," segir Guðbrandur en MS er rekstrarfélagí eigu rúmlega 700 kúabænda.

Hagræðing á tveimur til tveimur á hálfu ári

Aðspurður segir Guðbrandur að góð samstaða hafi verið um aðgerðirnar og farið verið í þær eftir hendinni. Þær hefjist í raun strax en forsvarsmenn félagsins reikni með að ná þeim öllum fram á tveimur til tveimur og hálfu ári.

Meðal þess sem grípa á til í sparnaðarskyni er að hætta að pakka mjólk og smjör á Austurlandi en sú pökkun verður flutt á Akureyri. Hins vegar verður mozzarella-ostur áfram framleiddur á Egilsstöðum. Aðspurður segir Guðbrandur að það komi til einhverra uppsagna vegna þessa á Austurlandi en ekkert liggi fyrir um umfang þeirra.

Nokkrir hafa áhuga á lóð Osta- og smjörsölunnar

MS stefnir einnig að því að flytja bita- og sneiðapökkun á osti úr húsnæði Osta- og smjörsölunnar í hús MS við Bitruháls og selja lóð og hús Osta- og smjörsölunnar. Sú lóð hefur verið sögð mjög verðmæt en að sögn Guðbrandar er hún 33 þúsund fermetrar að stærð. Hann segir nokkra aðila hafa lýst yfir áhuga á lóðinni en ekki liggi fyrir hvenær hún verði seld. Þá segir hann aðspurður að lóðin hafi verið verðmetin en vill ekki gefa upp hvert verðmatið er.